Cyhoeddwyd gan Channel 4
Bydd darllediadau Channel 4 o Gemau Paralympaidd Paris 2024 yn cael eu cynhyrchu gan y cwmni cynhyrchu annibynnol arobryn Whisper.
Dyfarnwyd y contract i Whisper ar ôl proses dendro helaeth a chystadleuol lle dangoswyd cynlluniau arloesol a chreadigol i adeiladu ar ddarllediadau Channel 4 o'r Gemau Paralympaidd sydd wedi denu clod ledled y byd.
Daeth Channel 4 yn Ddarlledwr Paralympaidd swyddogol y DU pan gymrodd yr awenau gyda Gemau Paralympaidd Llundain 2012, gemau sy’n aml yn cael eu crybwyll fel moment allweddol o ran newid sut mae’r cyhoedd yn meddwl am anabledd a chwaraeon anabledd.
Dywedodd Pete Andrews, Pennaeth Chwaraeon, Channel 4: "Mae darllediadau arloesol Channel 4 o'r Gemau Paralympaidd wedi cael cydnabyddiaeth fyd-eang ac rydyn ni’n ymroi i wthio'r ffiniau ymhellach o ran sut rydyn ni’n cyflwyno chwaraeon Paralympaidd i'n cynulleidfaoedd.
"Dangosodd Whisper eu bod yn cydsynio â dyheadau Channel 4 ar gyfer y Gemau Paralympaidd ac rydy ni’n edrych ymlaen yn fawr at weithio gyda nhw i lywio sut mae ein darllediadau o'r Gemau yn parhau i osod y safon yn fyd-eang."
Mae’r ffordd y mae Channel 4 yn buddsoddi mewn ymgyrchoedd marchnata pwerus ac arobryn – Meet The Super Humans; We’re The Super Humans; Super. Human. - hefyd wedi bod yn allweddol wrth newid sut mae pobl yn meddwl am anabledd. Ac mae'r darlledwr wedi cyflwyno amrywiaeth o dalentau ar y sgrin yn eu darllediadau Paralympaidd dros y blynyddoedd, gan gynnwys Adam Hills, Alex Brooker, Sophie Morgan, JJ Chalmers, Ed Jackson ac Arthur Williams.
Dywedodd Mark Cole, Rheolwr Gyfarwyddwr Whisper: "Mae cael y cyfle i gynhyrchu Gemau Paralympaidd Paris 2024 yn beth gwych i’r holl dîm. Roedd cynhyrchu Gemau Paralympaidd Tokyo 2020 wir yn foment fawr i ni ac, ac mae cael y cyfle i'w wneud eto, a chyda llai o gyfyngiadau Covid y tro hwn, a chyda hyd yn oed mwy o ryddid o ran creadigrwydd ac uchelgais, yn rhywbeth cyffrous iawn.
"Ein nod bob amser yw apelio at gynulleidfa fawr, amrywiol ac i ddiddanu, a hynny gan adrodd straeon anhygoel yr athletwyr a'r Gemau. Rydyn ni’n parhau i ymroi i sicrhau cynrychiolaeth anabl gref ar y sgrin a thu ôl i'r camera, ac mae hynny’n mynd y tu hwnt i gyfnod cynhyrchu'r Gemau Paralympaidd.
"Mae cymaint o werthoedd y Gemau Paralympaidd a Channel 4 yn cyd-fynd â'n gwerthoedd ni; mae wir yn anrhydedd cael darparu hyn eto, a diolch enfawr i Channel 4 am eu cefnogaeth.”
Mae Whisper wedi sefydlu ei hun fel un o brif gwmnïau cynhyrchu'r DU, ac mae eu gwaith yn cynnwys pencampwriaeth merched Euro 2022 ar gyfer y BBC, Fformiwla Un ar gyfer Channel 4, Today at The Test ar gyfer y BBC, Women's Super League ar gyfer y BBC, a Gemau Paralympaidd Tokyo 2020 ar gyfer Channel 4.
Ychwanegodd Alex Mahon, Prif Weithredwr, Channel 4: "Ddegawd yn ôl, roedd Llundain 2012 yn foment allweddol pan lwyddodd Channel 4 i rannu a dathlu cyflawniadau'r athletwyr penigamp hyn â chynulleidfaoedd ledled y DU. Mae effaith ein rhaglenni wedi mynd â'n cynulleidfaoedd y tu hwnt i'r llwyddiannau anhygoel ar y trac a'r maes, ac rwy'n hynod falch bod cred ac ymroddiad Channel 4 i'r Gemau Paralympaidd wedi helpu i newid barn a chalonnau ein cynulleidfaoedd. Rydyn ni wedi helpu i newid sut mae’r cyhoedd yn meddwl am anabledd mewn ffordd gadarnhaol, ac fel darlledwr rydyn ni wedi creu cyfleoedd go iawn i bobl anabl greu gyrfaoedd ym maes darlledu, a hynny ar y sgrin ac oddi arno."
Pan ddyfarnwyd hawliau darlledu'r DU ar gyfer Gemau Paralympaidd Paris 2024 i Channel 4, dywedodd Arlywydd IPC, Andrew Parsons, fod y darlledwr gwasanaeth cyhoeddus wedi “creu'r glasbrint ar gyfer sut y gall darlledwr masnachol godi proffil chwaraeon Paralympaidd a gwneud newidiadau aruthrol i agweddau tuag at bobl anabl ac i ganfyddiadau ohonyn nhw”.
Mae hawliau Channel 4 i ddarlledu Gemau Paralympaidd Paris 2024 yn cynnwys hawliau darlledu aml-blatfform o fewn y DU, a bydd y darlledwr yn adeiladu ar ei rhaglenni clodwiw sydd wedi torri recordiau gwylio’r DU ar gyfer chwaraeon Paralympaidd sawl gwaith.
